係，你無睇錯，影帝吳鎮宇首次參演音樂劇！著名百老匯愛情音樂喜劇《First Date》嚟緊8月會喺香港公演，呢齣被美聯社同紐約郵報評為「型！瘋狂好笑」同「非常有趣！」嘅音樂喜劇，香港版揾嚟吳鎮宇做男主角。原來參演音樂劇一直係吳鎮宇嘅心願之一，佢仲話呢個係佢做演員以來最大嘅挑戰，至於女主角王菀之就話可以同偶像吳鎮宇同台演出，整件事都好夢幻。
登入 瀏覽文章可賺取積分
吳鎮宇：當演員以來最大的挑戰
曾獲得第37屆台灣電影金馬獎最佳男主角嘅吳鎮宇，係公認嘅實力派。對香港人嚟講，吳鎮宇喺《衝上雲霄》劇集系列飾演嘅Sam哥，或者喺近期《逆流大叔》入面演嘅阿龍，形象更加係深入民心，演技真係無容置疑。
除咗電視、電影，吳鎮宇嘅舞台表演亦相當之受歡迎。佢喺1998、2000年，同黃子華、張達明，演出嘅《鬚根SHOW》共演出超過一百場，《鬚根SHOW》 嘅影碟亦賣超過20萬張，打破咗香港舞台場次紀錄，簡直係贏盡口碑呀！
吳鎮宇接受媒體訪問時表示，參演音樂劇係佢嘅心願之一，而且佢視今次演繹著名百老匯愛情音樂喜劇《First date》為佢做演員以來最大嘅挑戰！佢話因為要同時演戲、唱歌加跳舞，真係少啲力量都唔得。
香港版《First Date》其實喺改編自同名的百老匯愛情音樂喜劇。故事講述兩個素未謀面，生活喺繁忙都市嘅單身男女，喺家人和朋友安排之下，開始咗佢哋嘅第一次約會。
Aaron (吳鎮宇飾演)，性格保守嘅金融才子, 渴望尋找一段認真的戀愛關係；Casey (王菀之飾演)，就係充滿個性嘅藝術家, 追求自由奔放嘅生活。兩個風馬牛不相及，亳無共通點嘅人，喺得到愛管閒事嘅餐廳侍應幫忙下，開始咗第一次約會。
王菀之：不要在各位前輩前太失禮就好了
至於女主角王菀之，佢就話由百老匯確定劇目之後，因為得知能夠同偶像吳鎮宇合作演出，所以成個人都輕飄飄咁，形容整件事都好夢幻！
其實王菀之唔止係歌手同演員，佢喺戲劇演出方面亦頗具經驗。2006年開始參演舞台劇，2010年《柯迪夫Octave》19場演出全部爆滿，佢更憑為呢齣劇創作嘅歌曲入選第20屆香港舞台劇獎「最佳原創音樂」提名。2011年翻譯百老匯音樂劇《I Love You Because》為佢帶來第21屆香港舞台劇獎「最佳女配角」提名，證明王菀之嘅演戲天分得到業界肯定。
但喺戲劇方面咁有經驗嘅佢，一啲都唔敢鬆懈！現階段嘅佢表示啱啱完成劇本翻譯工作，正喺度加緊努力咁熟讀劇本，仲謙虛咁話：不要在各位前輩前太失禮就好了。
▲出爐金像獎最佳男配角袁富華依有份參演音樂劇《First Date》
另外，《First Date》音樂劇團隊嘅陣容亦相當強勁！由天邊外劇場藝術總監資深劇場導演陳曙曦執導，聯同一眾本港知名舞台劇演員袁富華、余迪偉、鄧志堅、吳鳳鳴及張月盈，以廣東話演譯呢套百老匯嘅著名劇目。
仲一點不可不提嘅，就係《First Date》喺香港公演嘅最大特色：舞台上有現場樂隊表演！《First Date》由著名音樂作曲家John Laudon（劉諾生） 擔任音樂總監，以最好嘅音樂演譯《First Date》知名曲目“First Impression”、“Something that will last”等等，佢嘅代表作品有《餓狼傳說》、《愛念》、《地球很危險》、《超錯》....等等
大家喺大螢幕上見吳鎮宇就見得多，唔知舞台上演音樂劇嘅佢又喺點樣架呢？嚟緊《First Date》將於2019年8月30日至9月8日，喺香港演藝學院歌劇院盛大公演，如果見到吳鎮宇嘅另外一面，就睇準時機買飛啦！
《First Date》 音樂劇詳情：
導演 : 陳曙曦
演員 : 吳鎮宇/王菀之/袁富華/余迪偉/鄧志堅/吳鳳鳴/張月盈
音樂總監 : John Laudon
日期 : 2019年8月30日至9月8日
夜8pm ：2019年8月30日至9月1日 - 9月3日至9月8日 (共9場)
日場3pm ：8月31日至9月1日 - 9月7日至8日 (共4場)
場地 ：香港演藝學院歌劇院